السلام عليكم
ترى هذي ثالث مشاركه لي ومالقيت إلا 5ردود على مواضيعي معقوله يعني
أتعب وادوج بالمنتديات وأخرتها كذا <<<<<<هههههههههه خخخخخخخخخخخخخخخ مسوي معصب
تكفون تكفون طلبتكم تهي تهي ابي ابكي عــــــاد ابي ردود تبرد السبد((الكبد)) حللوه بين قوسين ..........
المهم هالقصه منقوله من منتدى ثاني ونزلتها مثل ماهي للأمانه <<<أحلى يالأمانه
عـــــــــــــــــاد الله الله بالردود لأزعل وترى زعلي قوي مررره لأني إذا زعلت ..........أبكي ههههههههههههههههههه
مع القصه...........جاري التحديث<<<ههههههه أستعبط
ودي كالعاده أبدا في القصه بدون مقدمات لأني احس يوم اكتبها اني ثقيل طينه من جد وحتى لايجيني واحد ويقول اني ثقيل طينه خلقه بقولها أنا بنفسي أنا ثقيل طينه
المهم
طبعاً انا ولله الحمد قروي مع مرتبة الشرف الأولى
يوم كان عمري ثمان سنين
جاني مره الوالد حفظه الله ورعاه وقال لي
مفهي
قلت له سم يبه
قال يابوك (بوك والا محفظه ههههه ) انت وضعك ماهوب عاجبني
قلت افا وش اللي مو معجبك فيني وقام الشايب وزفر ذيك الزفره اللي فهمت من خلال مضمونها انه مو عاجبه شي فيني أبد
لكنه ماوده يحطمني وقال مدري احس انك فريخ
قلت وش فرخه ؟ قال (فرخ جنية يضرس ضريس)
لا والله قال اني فريخ يعني ضعيف ووليد نعمه وماش (أمحق ولد نعمه)
قال يابوك أنت يبي لك تخشوشن شوي ويبي لك تغير البيئه اللي انت عايش فيها الحين!! وجهك من كثر ماتجلس في البيت ومن قل الشموس << جمع شمس , صاير لونه اصفر يبي لك فيتامين دال عشان يرجع لونك الطبيعي واخاف يجيك وهن في العظام ومدري وش سالفته ذاك الليل شكله كان جالس مع طبيب بيطري قلب مخه
آخر كلامه قال لي بوديك للبر تسكن فيه فتره
قلت اعيش عند مين هناك ماخبر لي اقارب في البر ! قال ماعليك خالك حاط له غنم في البر وهو متقاعد وابيك تجلس عنده , وتراني كلمت امك ووافقت بعد ( العايله كلها تبي الفكه مني ) ومتأكد إنهم حتى لو أخذوا راي إمام المسجد وافق لأني أكثر الأحيان أجي عنك الميكرفون حق المسجد واجرب صوت حنجرتي فيه , واجلس العلع شوي إلين يجوني شيبان الحاره ويمسطوني على ظهري (ماقلت لكم ان النعمه مفارقتني ) , قلت لأمي تجهز لي شنطه عشان الرحله وتحط في الشنطه سنارة صيد سمك !! (دليل على اني مدري وين أنا رايح) !قالت ابشر بس لاتفتح الشنطه الين توصل عند خالك وستجد فيها مايسرك !!!(تعطيني على قد عقلي) , اليوم الثاني وابوي منطلق بالجمس حقه ونركب الخط السريع وبعدها نزلنا على البر وابوي مركبني في المرتبه اللي ورا لأني اذا جيت قدام معه احوس في المسجل ودرج السياره واجلس انطنط وراسي يصقع في السقف واحيانا اجي واحط وجهي قدام ابوي وبراطمي وخشمي تصقع في وجهه المهم إني قلق بقوه وماخليه يركز وهو يسوق , لذلك صار يحطني ورى وحاط له شبك بين المرتبه اللي ورى ومرتبته لخوفه إني أنقض عليه في أي لحظه , وصلنا لخالي في البر ونحصله جالس ومعه شيبان واسمع دندنة النجر يوم اقبلنا عليه , كان الوقت في العصر وهم طالعين برا في ظلال الخيمه , بصراحه جو حلو , ونسلم عليهم ونجلس قال خالي يامرحبا ويامسهلا الليله بنتعشى سوا ومن حبه الله جمع ضيفانه (ضيوفه) واسمعهم يسولفون عن المطر والديار والربيع وكم وصل سعر كيس الشعير
يوم تعشينا وخلصنا وراحوا الشيبان مابقى الا أنا وابوي وخالي , قال ابوي العلم وسلامتك أبي مفهي يجلس عندك في البر وابيك تعلمه البداوه والخشونه ابيه اذا كبر يطلع رجال ويعتمد على نفسه ومدري ايش , (الله يسامحك يابوي يعني ماطلع رجال الين اسكن مع الغنم هههههههه)
قال خالي لابوي ياشيخ روح بس وتعال بعد شهر اذا مالقيته هو اللي يذبح لك الذبيحه لاتسلم علي وانا ابو سامي << مخلي سامي عند امه في المدينه ويبي يتعلم فيني , المهم مشى ابوي ونزل شنطتي في الخيمه , يوم سرى ابوي مسكني خالي وقال اسمع وانا خالك ترى هنا مافيه حمامات يعني اذا بغيت تسويها روح دور لك شجره وخبص فيها على راحتك واياني واياك تروح لشجره قريبه والا عند الغنم وياويلك لو تسويها ف الخيمه والله لاجلدك إلين تنادي العنز يا ماما
قلت طيب وين ارقد ؟! قال روح ارقد في حوض الددسن , قلت طيب , واخذت بطانيه وطلعت في صندوق الددسن ونمت , اليوم الثاني وقبل تطلع الشمس الا وخالي يصحيني واقوم واتمغط شوي واسمع الصوت الكلاسيكي للغنم واروح اتوضا من الوايت واصلي الفجر مع خالي , وبعدها افطرنا وبعدين رحنا نسوق الغنم ونوديها ترعى يوم ابعدنا من الخيمه قال خالي اجلس عند الحلال وتابعه وانا بروح لشايب اتقهوى عنده , راح وخلاني لحالي مع البهايم !! وهي تمشي وانا امشي وراها بعد فتره حصلت قدامي غنم ثانيه غير غنم خالي , واحصل ذيك الددسن القديمه وامشي الين وصلتها ألا وذيك البنت البدويه اللي لابسه برقع وعليها جلال جالسه في غمارة السياره , يوم شافتني , قالت وش عندك انت , قلت ابد انا من جيرانكم في البر وجاي ارعى غنم خالي , قالت وش خالك ؟ قلت خالي ابو سامي؟ قامت ونزلت من السياره وهي طبعاً اطول واكبر مني وانا ما أجي عند كتوفها , المهم يوم نزلت قالت وخر حلالك عن حلالنا , انا بصراحه ماعرف افرق بين الغنم, قلت ماعرف !! درت اني برحه , قالت خير خير ان شاء الله وراحت ووخرت غنمها وهجت غنم خالي , يوم رجعت قالت مامعك موتر؟ قلت لا ماعنديش !! , قالت اجل اركب معي بروح اهج غنم خالك شوي وابعد بها , وانط في غمارة الددسن حقتها
بصراحه استغربت انها تسوق , قلت انتي من متى تسوقين لأن هذي اول مره اشوف بنت تسوق , قالت يابن الحلال من يوم عمري ست سنوات وانا اسوق , قلت اجل مستانسه انك تسوقين؟
قالت امحق وناسه الا بهذله كل يوم وانا آكل مطبات ومرات تغرس السياره وتنشب في الطعوس واجلس ادفها لحالي والا يبنشر الكفر واغيره , السواقه هم وسلامتك
قلت البنات عندنا في المدينه منى عينهم يسوقن , قالت خلهن يجون هنيا ويجربن السواقه والله مايكملن اسبوع الا وهن تافلات العافيه
قلت طيب وين اخوانك واهلك قالت اخوي عند أبل الشايب وانا مع الغنم واخونا الكبير مسجل في العسكريه وكل نهاية شهر يجينا وهو محمل سيارته شعير , راتبه كله في الشعير عشان مايموت حلالنا ,, قلت الله يعينكم
تصدقين ان خالي شاري الغنم وساكن في البر من باب التغيير والتسليه واني انا جاي بس اغير جو؟!
قالت ايه هذا انتم يالحضر ماتعرفون البر الا وقت الامطار والربيع لكن حنا طول السنه في البر , قلت طيب مستانسه في البر ؟ قالت البر زين وشين يعني لو ددسني ماصار فيها شي اروح اصيد ضبان وجرابيع والا اروح اسير على رفيقاتي في البر والا اسمع شرطان خلف بن هذال وحجاب بن نحيت !!
قلت من هذولا قالت هذولا الفنانين اللي نسمعهم ويازين قصايدهم وصوتهم !!!
قلت بالله سمعيني اغنيه من اغانيهم
وتسمعني أغنيه لواحد ماعرفه
الا واسمعه يقول
ياهل الكابرس بالله
وصلوني لعبد الله
صاحبي ساكن(ن) دونه
من هو اللي ينهب الغالي
ويعطي به في الخلا الخالي
ياهلي لاتلومونه !!!
قلت هذا وش يقول
قالت هذا يبي ينهب حبيبته وينحاش بها !!!
قلت طيب وين الشرطه عنه هذا اختطاف << (ياي يالحنين) وتقزني بذيك العين قالت انت وش عرفك الحب
قلت طيب سمعيني اغنيه لخلف
قالت طيب بس رجاء لاتعلق عليها اسمع وانت ساكت
الا واسمعه يقول
ارحمي من يحبتس ياجميله
لو تغيبين عني غاليه
ذقت في الحب ذوقة حنظليله
ذقت في الحب ذوقه حاليه
وتقلب الشريط واسمعه يقول
قلنا متى الميعاد زاد الهم زاد ياللي فتلت قيودنا حل القياد
يامغرق العاشق في لجات البحور الميتين من الهوى نصف القبور !!
انا الأسير اللي محير من سنين كم حسبة كسر علي حسابهااااااا ,, احسابهااا
وأنا اتنهد واقول (يضرب الحب شو بيذل يضرب الحب)
قالت ضربوك بمشعاب على جبهتك ياخبل
وقالت لي ان الأشرطه هذي يشتريها اخوها لها من محطات البنزين اللي على الخطوط السريعه وهي أغاني قدييمه مره وتسجيلها مو صافي
المهم يوم جا الظهر لقيت خالي راجع لي بسيارته قلت لها هذا خالي جا , استاذنك, ونزلت من موترها
وقبل انزل قلت وش اسمتس قالت صيته
وركبت مع خالي وقال من هذي؟! وقلت له هذي من جيرانا في البر !!
قال تصدق يامفهي انها اطيب منك !!! من الحماس خربها خالي الله يهديه
تدري ان هذي تشيل كيس الشعير بيد وحده وإنها أقوى مني ومنك وانها في البيت تحصلها شقرديه وتطبخ الذبيحه للضيوف وتسوي كل شي
ياحظ اللي ياخذها والله وانا لو ماني خايف من ام سامي تنشب بحلقي كان رحت اخطبها من ابوها وعساه يوافق بعد ومايكرشني ( شكل خالي خطب قبل وانكرش )
قلت والله البنت محترمه جداً وحتى قلبها طيب وحنين مره
المهم بعد فتره صرت شقردي واعرف اسوي القهوه واذبح الذبيحه لحالي وتعلمت السواقه في البر
واللي علمني اياها صيته فديييييييييييييييتها
وبعدها بفتره رجعت للمدينه وانا كلي عشق وحنين للعيش في البر
أتمنى تكون هالقصه حلوه لكم وسامحوني على الإطاله
تعمدت اني اجيب قصه عن الحياه في البر لأنها بالفعل حياه فيها نظافه وبراءه وطهاره ممتعه جداً
وبعيداً عن ازعاج المدينه وزحمتها
وشراااااااااايكم !!!!!!!!!! لاتنسووووووون الردود
السبت يوليو 26, 2008 12:49 am
